فصول السنة

كل مرة فصول السنة بتحب تلعبها معايا، و كل مرة اختياري بيكون واضح و يمكن جرئ، يعني مثلا الصيف اللي جاي علينا مرة واحدة ده، هو عارف كويس اني مبحبوش، بهرب منه سواء بالنوم أو الشغل أو القراية، هل هو عشان عارف ةني مبحبوش_انا و غيري كتير طبعاً_ هيحس على دمه و ميجيش؟ اكيد لا، قيس بقى ع كدة حاجات كتير
نيجي مثلا للخريف، بحب الفصل ده جدا رغم انه بيرمز الكآبة، بس بيبين الحاجة من غير غطا ، و بان لي في اشخاص بعينهم اول م ترابه و عواصفه رفعت عنهم القناع، بييجي بعديه الصيف و رطوبته و نسيم ليله احيانا ينضفوا اللي وقع ...
الربيع بقى ده حبيب الكل، بيغطي و يكسي الدنيا بخضرته على نضافة، بحبه كفصل من فصول الحياة مش السنة بس، بحب عصافيره و هي بتزقزق و تصحيني بدري اشم الريحان ، و الوردة البلدي الحمرا اللي زهرت، و بحب حبايبي اللي شبهه عشان بيغطوني بحبهم و خوفهم عليا زي م الربيع و عصافيره بيغطوا الدنيا باللون الاخضر، اصل الحب في القلب يكبر و يرعرع زي م الثمرة ع الشجرة تحلو و تزهر ... الشتا بقى، لولا اختلاف الاذواق لبارت السلع ، بس طبعا دي مش سلعة، ده فصل الدفا بالمطرة، قطر الندى الصبح بدري، شمس دافية و ليها شوقة و بالحضن تاخدنا، ناس متكتكة بتتدفى ببعضها، و شمسية عمري م حططتها عشان مبحبش استخبى منه