علبة ألوان

علبة ألوان 

أول م مسكت القلم ماما جابتلي علبة ألوان كبيرة، و اسكتش ورق أبيض ، فرحت اوي ، كنت صغيرة و مبسوطة ببهجة الالوان وهي بتدلدق أودامي علي الورق و تشكل اشكال يمكن أكون شفتها قبل كدة ، بس لما جربت مرة ارسم قلب و ألونه أبيض ، زعلت اوي ان اللون الابيض مش بيتدلدق علي ورقتي مع ان هي بيضا، بس كنت حاسة ان اللون الابيض ملوش لازمة في علبة الالوان، لما كبرت شوية بدل علبة الألوان الخشب جبت علبة الوان كبيرة فلومستر ، و رغم اني كنت لسة حاسة ان اللون الابيض مش مهم اوي أصل كدة كدة مش هيلون يعني، اشتريت علبة الوان شمع و علبة ألوان خشب من اللي فيهم الابيض لون أساسي، و من يوميها ابتديت اجمع اللون الابيض من كل علبة ألوان أجيبها و حوشتهم لون علي لون لحد م درج مكتبي اتملى ألوان بيضا، كنت مقتنعة جدا ان هييجي يوم و ألون بيهم قلوب الناس كلها، كبرت شوية كمان و كنت في حصة الرسم و الميس بتاعتي ابتدت تقول لنا ايه هي الالوان الاساسية و ايه الالوان الثانوية، مركزتش في كل اللي قالته ، كنت بس مستنية اسمع كلمة اللون الأبيض، اللي استغربته ازاي نقاء وجمال الابيض ميكنش لون أساسي، روحت زعلانة و فتحت درج مكتبي و بصيت علي ألواني البيضة، و لسة مقتنعة علي فكرة اني ممكن ألون بيها قلوب العالم، و أنا عندي 8 سنين بابا جابلي علبة ألوان و اسكتش كبير بورق ملون مفيهوش ورقة بيضا، و لما حفلة عيد ميلادي خلصت، فتحت علبة الألوان و اكتشفت ان ال 24 لون أبيض، استغربت، مفهمتش اوي، طيب هعمل بيهم ايه ، انا عندي ألوان بيضا كتير ، و بابا عارف، فتحت الاسكتش و جربت ادلدق ألواني عليه، طلعت بهتانة، ماعدا الأبيض، رسمت قلب كبير، وفضلت الون فيه أبيض، خدت مني وقت و مجهود عشان الابيض يكسيه من كل ناحية، بس اتلون  ، و يوميها ابتديت أفهم انعشان الأبيض يطبَع و ينعش الحاجة و يبان عليها لازم يكون انطبع عليها لون تاني، و في حصة من حصص العلوم اتأكدت من نظريتي لما عرفت الضوء ابيض و شفاف، و فرحت اوي لما عرفت اساس قوس قزح بألوانه المبهجة كان لون أبيض، يوميها روحت مبسوطة اتأكدت ان كل لون أبيض عندي قوس قزح شيلاه لوقت عوزة، و زادت رغبتي في اني ألون قلوب الدنيا كلها بلون أبيض، نفسي املا الدنيا ببهجة و جمال ألوان قوس قزح ....